لەشاری مەهاباد ژمارەیەک چالاکوانی مەدەنی و کەسایەتی سیاسی مانگرتنی یەک ڕۆژەیان بە داخستنی دوکان و بازاڕەکان ڕاگەیاند.
ئامانج لەم مانگرتنە ناڕەزای دەربڕینە بەرامبەر بە سیاسەتەکانی ئێران کەلە دوو ڕۆژی ڕابردوودا ڕێگری کردوە لە گردبوونەوەی خەڵکی مەهاباد، بڕیارە سبەینێ دوکان و بازاڕەکانیان نەکەنەوە و کرێکاران و کارمەندەکانیش تا کاتژمێر ١١:٠٠ نەچنە سەر کارەکانیان.
لە بانگەوازیی ئەو چالاکوانانەدا هاتووە، کە پاش خۆپیشاندانەکانی بانە، سنە، کرماشان و مەهاباد، نەک تەنیا هیچ وەڵامێکی ئەرێنی بە داوکارییەکانی خەڵک نەداریەوە، بەڵکو بە ڕەشبگیری و توندوتیژی هەوڵدرا دەنگی ناڕەزایی خەڵک کپ بکرێتەوە.
ئەو چالاکەوانانە داوا دەکەن حکومەتی ئێران کۆتایی بێنێت بە کوشتاری کۆڵبەرەکان و داوای لێبوردن و سەرەخۆشی بکات لە خێزانی هەموو کۆڵبەرانی قوربانی، هەروەها داواش کراوە کە هەموو دەستگیرکراوانی خۆپیشاندانەکانی ئەم ڕۆژانەی ڕابردوو بەبێ مەرج ئازادبکرێن و کەشی سەربازیی سەپێندراو بە سەر شارەکانی رۆژهەڵاتی کوردستان لاببرێت.
لەڕاگەیەندراوەکەی ئەو چالاکوانانەدا هۆشداری داوەتە حکومەت، کە ئەگەر داواکارییەکانی خەڵک جێبەجێ نەکرێن، ناڕەزاییەکان بە شێوەی دیکە بەردەوامیان دەبێت.
