ناوەندی خەباتی کرێکاری و جەماوەری لە کوردستان
چەند ڕۆژێکە کرێکاران و زەحمەتکێشانی ئێران، لاوان و ژنانی ئازادیخواز، دژی گرانی و بێکاری و نەداری، دژی دەسەڵاتی ئیستیبدادی جمهوری ئیسلامی، هاتونەتە مەیدان و لە زۆرێک لە شارە گەورەکاندا خۆپێشاندانیان وەڕێخستووە.
ڕژێمی سەرکوتگەری ئیسلامی هەوڵ دەدات بە ئاگر و ئاسن ناڕەزایەتی و خۆپێشاندانەکان دابمرکێنێتەوە. تا ئێستا وێڕای گرتن و دەستبەسەرکردنی سەدان و ڕاوەدوودانی هەڵسوڕاوان، زیاتر لە بیست هاوڵاتی بە تەقەی هێزە سەرکوتگەرەکانی ڕژێم گیانیان لەدەستداوە و دەیانیش بریندار بوون.
ئەم شەپۆلە لە ناڕەزایەتی زۆر بەخێرایی خواستی ڕۆیشتنی دەسەڵاتی گەندەڵی مەزهەبی و ئیسلامی خستەڕوو، کە بەڵگەیە بۆ بنبەستی هەموو چاکسازیەک لەژێر سایەی ئەم ڕژێمەدا و خەڵکی کرێکار و زەحمەتکێش بە ئەزمونی چەندین ساڵەی خۆیان بۆیان دەرکەوتووە کە چارەسەری بێکاری و گرانی، ڕزگاربوون لە ژیانی کولەمەرگی و بێمافی، دەبێ هەڵپێچانی ئەم دەسەڵاتە گەندەڵە بێت.
ڕژێمی جمهور ئیسلامی، وەک دژە شۆڕشێک لەسەر تێکشاندنی شۆڕشی 1979ی ئێران دەسەڵاتی گرتەدەست و زیاتر لە سیوهەشت ٣٨ ساڵە بە یاساوڕێسا ئیسلامیەکانی، بە دەزگا سەرکوتگەرەکانی لە (بەیسیجی) و (سوپای پاسداران) خەریکی داسەپاندنی بێمافی و سەرکوتێکی لەڕاددەبەدەرە، ئەویش لە پێناو هێشتنەوە و بەرگری لە سیستمی سەرمایەداری ئێران. ئەمڕۆ قەیرانی ئەم سیستمە سەرمایەداریە بۆتە قەیرانی خودی دەسەڵاتی جمهوری بورژوا ئیسلامیش.
ئەم ناڕەزایەتیانە لە ئێستای ڕۆژهەڵاتی ناوەڕاستدا هەر لە مەغریب و جەزائیرەوە بیگرە تا کوردستان و عێڕاق و ئێران ئاماژەیە بۆئەوەی کە سەرمایەداری و دەسەڵاتە ڕەنگاوڕەنگە قەومی و ئیسلامیەکانی توانای دابینکردنی ژیانێکی ئاسایی و بەڕێوەبردنی کۆمەڵگەیان نەماوە بەبێ برسی کردن و بێمافی و سەرکوتی ئاشکراو بێ پەردە.
ئەزمونی شۆڕشەکانی تونس و میسر لە گیرسانەوەیان لە سنوری ئاڵوگۆڕیەک لەسەرەوە بە وەلانانی سەرانی نەفرەت لێکراوی ڕژێمەکان و هێشتنەوەی هەمان سیستمی ئابوری کۆمەڵایەتی، دەریخست لەگەڵ هەموو قوربانیدانێکی کرێکاران و زەحمەتکێشان و ئازادیخوازان بۆ تێکشکاندنی ئەم دەسەڵاتانە بەڵام بارودۆخی ژیان و گوزەرانیان لەشوێنی خۆی مایەوە.
ئەم قەیرانە ئابوری و سیاسیەی ئێران کاتێک لەبەرژەوەندی کرێکاران و زەحمەتکێشانی ئێران و ڕۆژهەڵاتی ناوەڕاست کۆتایی دێت، کە ناڕەزایەتی و خۆپێشاندان، هاتنەمەیدان و ڕاپەڕین تەنها لەو شوێنە نەگیرسێتەوە کە ئاڵوگۆڕێک لە ڕژێمی سیاسی و لەسەرەوەڕا بێنێتەدی، بەڵکو پێویستە تەواوی ئەم سیستمە ئابوری و کۆمەڵایەتیە بە خۆی و عەمامە و مێزەری ئیسلامیەوە گەسک لێبدات.
بژی خۆپێشاندان و ناڕەزایەتیەکانی ئێران
مەرگ و شەرمەزاری بۆ جمهوری ئیسلامی ئێران
بژی ئازادی و سۆشیالیزم
4-1-2017
سەبارەت بە خۆپێشاندانەکانی ئێران
