دوای جێگیربوونی گرووپێكی هێزەكانی حەشدی شەعبی لە شاری شنۆ، سەرچاوەكان باس لەجێگیربوونی گرووپێكی دیكەی ئەو هێزە عێراقییەی نزیك لە ئێران لە نێوان شارەكانی سەقز و بۆكان دەكەن.
لەماوەی ڕۆژانی ڕابردوودا زیاتر لە ١٠٠ كەس لەهێزەكانی حەشدی شەعبی بە شێوەیەكی نهێنی لە نێوان شارەكانی سەقز و بۆكان جێگیر بوون.
فەرماندەیەكی سەربازی لەسەقز وێڕای پشتڕاستكردنەوەی ئەو هەواڵە بەرێكخراوەكەی راگەیاندووە، ئەو هێزانە بە شێوەیەكی تەواو نهێنی لەكەمپی ناسراو بە ”كەمپی دیلە عێراقییەكان“ لە نێوان گوندەكانی ”سەرچاوە و سەرا“، كە لە سەر جاددەی سەقز بۆ بۆكان هەڵكەوتووە، جێگیر بوون.
ئەو سەرچاوەیە ڕێژەی چەكدارەكانی حەشدی زیاتر لە ١٠٠ كەس ڕاگەیاندووە و ئاشكراشیكردووە، هەموو جۆرە چەك و چۆڵێكیان پێیە و هێزێكی پۆشتە و پەرداخن.
ناوەندە ئەمنییەكان هاوكات ئەندامانی لایەنە توندئاژۆ ئیسلامییەكانی شاری سەقزیان چەكدار كردووە هەتا لە ئەگەری هەرجۆرە ناڕەزایەتییەك لەو كەسانە وەكوو ئامارازی سەركوت و بە مەبەستی ترساندنی خەڵك كەڵكیان لێ وەربگرن.
